عزيزي زائر شبكة ادما وعضونا الكريم يجب عليك كتابة بريدك الإلكتروني بالأسفل ثم اضغط زر اشتراك ليصلك جديد

ريــــــــــان · 05-06-2008, 09:52 PM

الموضوع دا منقول من منتدى ميرهان الرسمي لكل من شككوا في استقبال أميرتنا

المسألة كلها كانت حكاية وقت لحد ما الصور و الفيديوهات تنزل

بس للأسف في ناس بتحب تحط نفسها في مواقف محرجة و تتكبس في الآخر

أسيبكم مع الموضوع

بس بليز يا جماعة اصبروا شوية لحد ما الصور تنزل لأن حجمها كبير أوي

تحياتي لكم و فرجة سعيدة

في البدايه أنا بعتذر لكل جمهور ميما العظيم من كل الدول العربيه على التأخير في رفع الصور بس فعلا أنا رجعت مرهقه أوي و كان في مشكله في كمبيوتر البيت فاضطريت استنا لتاني يوم لما اجي الشغل ,و عايزه أشكر جمهور ميما واللي بجد رغم حبي لميما ماكنتش أعرف أنهم كثير كده ... أنا من أول مانزلت تلفوني في اعلان الاستقبال و أنا بستقبل كمية مكالمات رهيبه للسؤال عن ميما , وأنا في المطار تلفوني مابطلش يرن و يستقبل رسائل ناس من كل الدول العربيه بتسأل ميما وصلت بالسلامه و لا لسه تلفونات من السعوديه , اليمن, السودان,الكويت,تونس,ليبيا,سوريا و طبعا مصر "واعزروني لو نسيت اي جنسيه من كتر المكالمات"

معلش أنا برغي كثير بس جاتلي طلبات كثير من الناس اللي ماجوش أني أحكي بالتفصيل علشان يحسسوا أنهم كانو موجودين

أنا وصلت المطار الساعه 10:00 تقريبا كان في ناس وصلت قبلي بالذات اللي جايين من سفر وفي ناس كانت موجوده في المطار بس مش عارفين يوصلولنا ولما كلموني على التلفون بدأنا نتجمع , ودي صوره لبعض الناس اللي كانت موجوده , أنا مش شايفني طبعا علشان أنا اللي بصور هههه, و في كمان واحد لابس قميص نبيتي ده من الناس الي بتشتغل في المطار أخد منا بوستر و طلب يتصور معانا

مفيش نص ساعه و طنط كانت وصلت هي ووالد ميما و أخوها و خطيبتو اللي أول ماشوفناهم فرحنا كأننا شفنا ميما و قابلناهم بالتصفيق وكأنهم نجوم سينما - طبعا مش أهل ميما- "أنا حاسة أن بعد كده الناس هيتصورو معايا علشان انا من منتدى ميما " و بدأ الجمهور ياخد صور مع أهل ميما وعلى فكره أخوها نزار في كثير من زاهر زي ماميما كانت دايما بتقول واللي يتعامل معاه يلقيه دمه خفيف و شخصيه متواضعه و واثقه من نفسها و خطيبتو شخصيه تلقائيه و طيبه أوي , بجد يا جماعه ماشاء اله أسره جميله و محترمه و تدخل القلب من غير كلام

و حبينا مانفوتش الفرصه وناخد برضه صوره لبعض أعضاء المنتدى مع عائلة ميما الجميله

و دول بقه بنتين جمال أوي مسمين نفسهم بازو و ديزل بيموتو في ميما و كانو بيعيطو علشان ميما لسه ماجتش و ماسكتوش غير لما قلتلهم طب اتصورو مع صورتها لحد ماتيجي , و مش عايزه أقولوكم كام أم أتصلت بيه تطمن على ميما وتقولي ولادي بيحبوها أوي و منهم ولد صفير لما سمع مامتو بتكلمني قعد يغني ميما الصغيره (طبعا البرائه متحبش غير البرائه اللي زيها )

و خلال ما أحنا منتظرين و بنتصور مع بعض في كام واحد برضه من العساكر جاء و طلب مننا بوستر بس كانو في الخدمه فاخدوها و مشيو على طول , و في كمان واحد من الأمن كان لابس قوات جويه راجل بسيط من الي في الجيش جه سألني ممكن تدوني بوستر و تصوروني معاها أنا بحبها أوي , قولتلو أنت عارفها قاللي آه طبعا بشوفها يوم الجمعه لما مابيكونش عندي نبطشيه و مراتي في البلد بتحبها أوي "حتى ولاد البلد الجدعان بيحبوكي يا ميما"

على الساعه 12:05 أعلنو وصول الرحله فبدأنا نتجمع حولين المخرج الي ميما هتخرج منه

و مش عايزه بقى أقولوكو قد ايه جمهور ميما كان واقف يعد الثواني في انتظارها , تقريبا ميما كانت المصريه الوحيده على الطياره فكان أي حد بيخرج بنقولوا حمد الله على السلامه نورت مصر هي ميما جوه ؟ فكانو بيبتسمو ويقولو أه لسه جوه و ميفوتش دقيقه و يخرج حد تاني برده يرحبو به و يسألوه و كأنهم بيصبرو نفسهم بسيرتها

في بقى سيدة محترمه جدا من الضيوف اللي جايين لبنان لقناها وقفت تتكلم معانا و قالتلنا أنها بتحب ميما أوي و متابعاها و تمنتلها التوفيق و أحنا قلنلها و أحنا كمان بنموت في سعد و نتمناله كل خير

و لما بدأت الناس يخرجو و أحنا مش شايففن ميما بدأ الجمهور يهتف باءسمها و ينادي بظهورها و يغنيلها و تعالت الهتافات حتى طلب الأمن من والد ميما ان يصيطر على الجمهور اللي هيكسر المطار بس يسيطر على مين حب ميما كان فوق كل اعتبار , و أسيبكو مع شوية صور للتجمهر

الراجل الأصلع اللي في الصوره دي كان مستني واحد صاحبه بس لما عرف ان ميما جايه وقف يغني و يهتف معانا

وفجأه واحنا مستنين لقينا ظابط جاي و بيقولنا ميرهان مشيت خلاص , سألناه ازاي اذا كان والدتها و أخوها وصديقاتها موجودين أهم , قال من التجمهر ده أحنا جالنا تعليمات نوصلها لغاية البيت و أحنا اخدناها من باب ثاني في عربية والدها و هو معاها و بيرافقهم ظابط رتبه عاليه و في كمان عربية حراسه وراهم علشان نضمن انها وصلت البيت من غير أي تجمهر حتى في الشارع .....

فجأه سكت الكل و البسمه غابت و الحزن اترسم على كل الوجوه حتى اللي حاول يداري معرفش !!! ازاي ؟ مش هنشوفها؟ مش هنسلم عليها؟ مش هنصورها و لا نتصور معاها ؟ مش هنغنلها الأغاني اللي بتحبها؟ مش هتعرف احنى بنحبها قد ايه؟ طب مش هينفع تيجي تاني ؟ ده في قاعه متأجره مخصوص علشانها هي و جمهورها ! و مش أي قاعه دي قاعه داخل المطار مش أي حد يقدر عليها! كل ده هيروح بلاش

و في وسط حاله الهدوء و التخبط خرج صوت طنط ناديه من وسط الجماهير وقالتلنا بشخصيتها اللي يندمج فيها الصرامه بالحنان في نفس الوقت "يا جماعه متقلقوش ميما هترجع تاني علشانكم و الحجز احنا مديناه متقلقوش تعالو نستناها مع بعض

و فعلا وسط فرحة البعض انه لسه في امل نشوف ميما و حزن البعض لأنه مضطر يمشي "علشان الي ممستأذن من شغله و اللي عنده امتحان واللي ولادها هيرجعو من المدرسه " , ذهبنا الى القاعه و فضلنا في حالة قلق لحد ما نزار قال أنا رايح اجبها من البيت و ساعتها البهجه رجعت غطت المكان و قعدنا نغني و نسترجع زكريات ستار أكاديمي و نقول رأينا في أحداث البرنامج و شخصيات الطلاب و قد ايه ناس كثير في مصر حبت أمل محلاوي و امل بشوشه و نادر و قويدر و سعد و زاهر و غيرهم, وقلنا كمان على ماميما تيجي ناخدبوستر و نكتبلها على ظهره ايه اكثر حاجه عجبانا فيها "سؤال صعب أوي كل واحد عايزلو بوستر لوحده بس قلنا نختصر قد مانقدر" بس برضه طبعا بوستر واحد ماكفاش

و فجأه عرفنا ان الأميره وصلت بس قالولنا ماتطلعوش بره القاعه علشان ما يحصلش مشكله تاني فخرج بس الناس اللي بتصور و البنوته الجميله اللي لبستها عقد ورد يليق بجمال البرنسيسه

و بعد كده دخلت ميما القاعه وسط تصفيق و هتاف الجمهور و جاءت مدام رانيا و لبستها تاج الماظ ليكتمل تتويج أميرة القلوب "معلش مالحقتش اصورها و هي بتلبسو من الهجوم اللي حصل , بس دي الصوره بعد مالبستو"

بدأو صديقاتها يسلمو عليهابعدوالدتها طبعا بس انا حطالكو صوره واحده بس كمثال و اكيد كله هتشوفوه في الفيديو بالتفصيل

و بعد ماسلمت عليهم بدأت تسلم على الجمهور و دي صوره سيده جاءت مخصوص من المنصوره بلد العظماء علشان تقابل ميما و ما ان اقتربت منها حتى اخدتها بالحضن و اخدت في البكاء حتى تأثرنا جميعا لكن ميما بحنانها المنقطع النظير ضحكتلها و قالتلها بتعيطي ليه بس أنا كويسه اهوه فنظرت السيده لوالدة ميما بكل الحنان و قالتلها ربنا يخليهالك

و بعد كده بدا المعجبين يطلبو من ميما توقعلهم و تكتبلهم اهداءات

و طلبنا منهم يخلوها تقعد بس علشان تكتب براحتها

نزال بيحاول يوصل لأخته بس مع التجمع قرر يشوفها في البيت اسهل

و طبعا وسط التوقيعات كان ميما بيجلها تلفونات على موبايلات الجمهورمن كل مكان يباركولها على الرجوع و في الصورتين دول هي بتكلم معجبه من تونس و معجبه من السعوديه

و بعدين قلنا علشان نخفف الضغط طلبنا منها تقعد على الاستيج والناس تتكلم معاها

بس على مين هم خمس دقائق و بدا الجمهور يلتف حوليها تاني لأخد الصور و الكلام معاها

و نادين اختها بتحاول توصلها برضهههههه مش عارفه , يا نادين اعملي زي نزار و كلموها في البيت براحتكو انما هنا سيبوهلنا بقه

وبعد كده مشينا مع ميما و على باب المطار فرقعنا الورق الملون اللي غطى كل المكان و ركبت ميما العربيه و مشيت و بجد بجد بجد كان يوم من اجمل الأيام أخلاص الناس لحب ميما و اخلاصها لجمهورها أضفى روح جميله أوي ... معلش في تفاصيل كتير ماكتبتهاش بس تعبت و عايزه بس أشكر كل اللي ساهمو في اسعاد ميما و جمهورها في اليوم ده و بشكر عائلة ميما و صديقتها منال اللي مستخصروش في جمهور ميما انهم يفرحوهم سواء بأنهم اجرولنا القاعه دي و كانو حريصين على اخدها داخل المطار علشان محدش يتبهدل في المواصلات و كمان علشان اصرارهم هم و ميما على رجوعها تاني لينا

حمدالله على السلامه يا سندريلا

تحياتي لجميع

سعد ومصطفى وبس · 07-06-2008, 04:05 PM

حمدلله على سلامتها وكل الناس بتحب لميما من طيبتها واخلاقها وجمالها ورقتها وكل شي فيها حلو والله يخليها لاهلها يارب

كات والف · 09-06-2008, 02:07 PM

تسلمى على نقلك لنا الصور والاخبار كأنى ذهبت فعلا للمطار
فشكرا جزيلا لك
وشكرا لانك فرحتينا بشوفتنا لاميرتنا الحبيبه ميما ربنا يجعلها نجمه عاليه فى سماء الفن

فرح2000 · 10-06-2008, 10:07 AM

انا ممعجبه ببنت بلدى وهى شرفتنا ورفعت رسنا

kolet · 12-06-2008, 12:07 AM

والله ميما بتجنن ونحنا كانا منحبا كتيييييير وانا كتير زعلت عليها بس طلعت وشكرا
kolet

shymaaa · 18-06-2008, 03:43 AM

مجهود رائع تسلمى

منتديات ادما - العاب ادما - يوتيوب ادما

عزيزي زائر شبكة ادما وعضونا الكريم يجب عليك كتابة بريدك الإلكتروني بالأسفل ثم اضغط زر اشتراك ليصلك جديد