عزيزي زائر شبكة ادما وعضونا الكريم يجب عليك كتابة بريدك الإلكتروني بالأسفل ثم اضغط زر اشتراك ليصلك جديد

***لولي*** · 29-06-2007, 03:58 AM

[align=center]السلام عليكم ورحمة الله وبركاته

معايا ليكم قصة بصراحة هي من كتاباتي ..

أول تجربة ليا في كتابة القصص ..

قلت طبعا مافي غير أعضاء منتدايا الغالي هما الي حيعطوني رايهم ..

راح أبدأ بسم الله وأحطها ..

وإلي عنده اي ملاحظه أو أي تعليق أو أي حاجة يقولها أوكي ..

لحد يستحي قولو الي في قلبكم ..

ابطال القصه

عائلة أبو مازن

أبو مازن ( عبدالاله) : رجال كبير يمكن عمره قرب للـ 50 يشتغل كابتن في الخطوط
أم مازن (فايزه) : حرمة عادية ست بيت بس شخصيتها قويه يعني هي الي كان لها الدور الأول في تربية عيالها بس بنفس الوقت مرحة وحنونه ومتفهمه
مازن : متزوج وعمره 32 يشتغل مضيف عنده بنوووته تجنن عمرها سنة اسمها تينا ..
منال : طويلة وبيضاء وجسمها وسط وشعرها لونه بني يوصل لكتوفها عمرها 30 سنة متزوجة وعندها ولد عمره سنتين اسمه فراس
مرام : طولها عادي معقول وزنها يجي بالستينات يعني جسمها لايق مع طولها عمرها 25 سنة متخرجة من الجامعه قسم محاسبة وكل همها البيزنس والعقار ودحين هي مملكه
ملاك : تجي اقصر من مرام يعني تعتبر قصيره نوعا ما بيضا شعرها يوصل لنص ظهرها من النوع الكيرلي عمرها 20 سنة تدرس في الجامعه قسم موارد بشرية << ترى نفس قسمي اخترته عشان لو صادف وعندهم اختبار اعرف ايش ياخدو مواد خخخخ

&&&&&&&&&&&&&&&&&&&&&&&&&

عائلة أبو رامي

أبو رامي (صبري) : اخو ابو مازن وهو أصغر منه عنده شركه على قده يديرها
أم رامي (نوال) : برضو ست بيت حرمة طيبة مرررررره وتحب الطبخ وهوايتها هي وسلفتها يشوفو برنامج الشيف اسامه << زي ماما خخخخخ
رامي : شاب طويل جسمه نحيف وطبعا فيه عضلات موضة الشباب الأيام هادي لونه حنطي شعره طوله عادي يعني طبيعي عشان لو عنده تسريحة كول ممكن يسويها بس نااااااعم واسوووود عمره 25 كان هذا آخر ترم له في الجامعه قسم علوم حاسبات لسه حتى مالقى وظيفه
رازان : عمرها 20 سنه قد ملاك وصحبتها مرررررره تدرس معاها في نفس القسم طولها حلو وجسمها حلو الي يجي من الوسط نحيف ومن تحت مليان شويه بس مو كثير يعني معطيها منظر حلو
رائد ورامز : آخر العنقود توأم هما طبعا تحفة البيت عمرهم 13 سنه سنة أولى متوسط طالعين ثاني كل همهم البلاي ستيشن

والباقيين راح نتعرف عليهم من خلال القصه

&&&&&&&&&&&&&&&&&&&&&&&&&&&

الجزء الأول

طبعا العطله الصيفيه بدأت وغالب الناس يبغو يسافرو ويغيرو جو فالعائلتين الي عرفتكم عنهم راح يسافرو مع بعض يروحو على ماليزيا

يوم السفر في الصباح
صحيت ملاك على صوت أبوها وهو يزعق لازم يعملهم حكاية لما يكونو مسافرين طبعا ملاك مو من عوايدها إنها تنام ليلة السفر بس قالت المره هذي ابغى انام عشان أستمتع بالسفريه

ملاك : قامت وهي تأفف لا حول ولا قوى الا بالله لازم الزعيق حق بابا يوم السفر ..

مرام : ملاااااااااااااااااااااااااااااااااك هيييي إنت لسه نايمة يابروووودك سامعه المناحة الي بره ونايمة

ملاك : خير خير وجع خرقتي أذني منتي شايفاني صاحية ولا لازم تعملي فيها قدام بابا عشان يكمل التهزيء عليا

مرام : طيب خلاص بشويش فكرتك نايمة يلا قومي بسرعه قبل ما بابا يشوفك انتي عارفاه مايحب يتأخر على مواعيد الطياره لازم نروح قبل الرحله بعشره ساعات خخخخخ

ملاك طالعت فيها بس ماعلقت خرجت من غرفتها لقت أبوها في وجهها جالس حايس بين الشنط ويبغى يعرف كم شنطه راح ياخذو طالع فيها لقاها دوبها صاحيه طالعت فيه هي تبغى تهدي الموقف قالتله : سلام

أبو مازن : هلا ماشاءالله دوووبك صحيتي

ملاك عشان تنقذ الموقف : لا الله يهديك بس من أول صاحيه وبعدين شنطتي جاهزه اهي قدامك وأشيائي كلها طلعتها من في الليل يعني ماباقيلي غير اللبس وخرجت من الغرفة عشان انادي ع الشغاله تاخذ ملابسي تكويها ..

أبو مازن (مامشت عليه) : طيب صادقة يلا اشووف روحي البسي بسررعه وغسلي وجهك قال صاحيه من أول

ملاك تبغى تشرد : طيب عن إذنك

جات أم مازن ومعاها المفاتيح حقت الشنط تقول لأبو مازن : خذ ياعبدالإله لقيتها جنب الشنطة الصغيره حقتك ..

أبو مازن : طيب كويس بالله شيكي على الشنط وتأكدي كل وحده في لها مفتاح ولا لا

أم مازن : ماعليك شيكت عليهم كلهم وكل شنطة بمفتاحها ..

مرام : ماما انا مفتاح شنطتي معايا ..

أم مازن : خلاص طيب قفلتيها كويس ..

مرام : إيوة خلاص ..

\

\

\[/align]

***لولي*** · 29-06-2007, 04:00 AM

[align=center]أبو مازن : خلاص طيب انا دحين بروح المطار مع صبري وحنودي الشنط , مرام شوفي ملاك لو تبغى تحط شي معانا قبل مانروح مو تجي بعدين تمتحنا

مرام : طيب دحين اروح

مرام راحت لعند ملاك الي دوبها كانت خارجه من الحمام

مرام : يقولك بابا خلاص حطيتي كل أشيائك في شي تبغي تحطي مع الشنط ولا لا

ملاك : لا خلاص كل شي محطوووط

مرام : اوكي

راحت مرام عند ابوها تبلغه انه كل شي اوكي وقالهم انه رايح وبعدين هما يلحقوه مع بيت عمهم

&&&&&&&&&&&&&&&&&&&&&&&&&&&&&&&&&&

دخلت ملاك غرفتها المشتركه طبعا فيها هي ومرام بس غرفتهم كبيره يعني كان ينفع كل وحده تاخذلها غرفه بس هما لا نامو مع بعض بس كل وحده تحسي جهتها بعيد عن الثانيه من كبر الغرفه

طالعت ملاك في جوالها وجلست تضحك قالت في بالها لبين ماتكويلي الخدامة الملابس خليني أتصل في منال تبغى تقهرها لأنها ماحتروح معاهم
<< تضحك ملاك هذي طبيعتهم هي واخواتها يحبو يعاندو في بعض استهبال يعني

مسكت جوالها واتصلت على أختها المسجل اسمها بأم فرووووس يعني فراس خخخ

منال وبصوت كله نووووم : ألـــــو
ملاك : مرحبــــــــا صبــــــاح الخيـــــــر
منال : هلا صباح النور
ملاك تعاند في اختها : ياحرام نايمة ماعندك شي تسويه هااا البيه فاضل في العمل وإنتي جالسة طفشانه
منال : خير إنتي داقة عليا من صباح ربنا تعاندي وبس اخلصي ايش تبغي
ملاك : يالطيف الوحده يعني ماتسلم على أختها الكبيره الحلوه
منال : إيوة باين , المهم كيفك إنتي وكيف ماما ومرام وبابا
ملاك : الحمدلله كلهم طيبن , ياحرااااام منووول ماحتروحي معانا ماليزيااا
منال : عادي عادي اصلا قلت لفضووولي وهو قالي أي وقت يسمحولي العمل آخذ فيه إجازه وأهلك هناك راح أوديكي عندهم ..
ملاك : ههههههههههه مسكينه صدقتي تراه يحايلك
منال : وجع والله يتكلم جد حتى قدم طلب ع الاجازه في العمل وقالو يردو عليه كمان كم يوم
ملاك بالعكس تبغى اختها تكون معاهم : يلا ان شاءالله يوافقو ع الإجازه وتجو وتنبسطي معانا عشان نلعب فرووووسي شويه , اصلا ماما كل شويه تقول خساره حنروح ومنال وفرووووسي مو معانا ..

وهي بتتكلم طالعت في جوالها لقت رازان معاها ويتينق
قالت لمنال : خلاص منول أكلمك واحنا طالعين دحين روز بتتصل عليا خليني أشوف ايش تبغى
منال : خلاص اوكي سلمي ع الجميع , يلا مع السلامه
ملاك : الله يسلمك , مع السلامه .

ردت ملاك على روز الي هي رازان

ملاك : هلاااااااااا روووووووز
رازان : هلاااا والله ميمي
ملاك : ها كيف استعداداتك للسفريه , استني اصلا من غير ماتتكلمي من صوتك باينه الفرحه يعني ماحتاج تقولي ههههههههه
رازان : ايوة والله فرحانه وبقوه كمان ماصدقنا اخيرا حنروح ماليزيا ومع بعض فللللللله والله
ملاك تبغى تستهبل عليها : مشكله الي مايسافرو
رازان : ميمي وجع روقي ها هادا وانا الي مبسوووطه اننا حنسافر مع بعض
ملاك : وي تعالي أمزح معاكي , المهم اللبس على اتفاقنا
رازان : إيوة انا لبست خلاص
ملاك : أنا دحين ألبس اوكي اشوفك واحنا رايحين سي يوو
رازان : اوكي باي

أخذت ملاك ملابسها ولبست ومشطت شعرها ورفعته ورسمت عيونها بالقلم الأسود ورسمت حواجبها وحطت قلوس لونه اورنج بس مو غامق مره وشويه بلشر ولبست ساعتها واكسسواراتها وجهزت لابتوبها وكاميرة الفيديو وكله ..

&&&&&&&&&&&&&&&&&&&&&&&&&&&&&&&&&&

في هذه الأثناء مرام كانت تكلم خطيبها وهي بتكمل لبسها تحاول تقنع فيه انه يروحله كم يوم هناك بس هو مو راضي

مرام : سااااااامر يلا تعال وبلا دلع
سامر : والله رووومه مدري احاول اشوف كيف الوضع عندي
مرام : طيب ياقلبي على راحتك , عموما دحين بقفل عشان خلاص شكلنا دحين رايحين
سامر وهو مبتسم : إنتي الي دحين حتروحي لأنه مافي غيري حيوصلك وانا تحت جالس استناكي يلا أنزلي
مرام وهي فرحانه : والله طيب خلاص دقايق وانا عندك ..
سامر : اوكي باي
مرام : باي .

راحت مرام بلغت أمها انها حتروح مع سامر ورجعت على غرفتها أخذت عبايتها واشياءها وقالت لملاك : يلا أنا طالعه ..
ملاك : فين رايحه لسه بيت عمو صبري ماجو مو قال بابا نحرك مع بعض ؟؟
مرام : لالا أنا رايحه مع سامر هو الي حيوصلني
ملاك : اهااا اوكي
مرام : يلا سلام
ملاك سلام

وماجات دقايق الا ورازان متصلة على ملاك تقولها يلا أنزلو هما جم راحت ملاك تقول لامها الي بدورها كانت تتأكد إنه كل شي أتقفل والأبواب كلها مقفوله وأخذو الخدامه وكل شي وراحو عشان يركبو السياره متجهين للمطار

&&&&&&&&&&&&&&&&&&&&&&&&

في السياره

رامي واااااصله معاه واخلاقه زفت طول اليوم كان مواصل ووسهران ع النت ويادوبك مانمله غير ساعتين وقام عشان يجهز باقي الأشياء

وأم مازن وأم رامي جالسين يتكلمو وملاك ورازان جالسين يخططو ايش حيعملو لما يروحو ورائد ورامز ماعندهم سالفه غير ايش آخر شريط نزل في البلاي ستيشن وكل واحد ماسك الجيم بوي حقه وجالسين يلعبو فيه

وشويه كذا الا وهم واصلين للمطار نزلو وطلعو أشياءهم ملاك حايسه تشيل اللابتوب ولا كاميرة الفيديو لأنه مرام قيدها راحت من بدري وما أخذت شي معاها ورازان برضو شايلة أغراضها ورائد جالس في السياره مندمج في اللعبه ومو راضي ينزل مانزل الا بصرخة من رامي طيرته من مكانه لدرجة إنه دخل المطار أول واحد وكلهم جلسو يتضحكو عليه

ودخلو كلهم بعدها لقو كل شي جاهز اتوجهو لصالة السفر بعد ماودعت مرام سامر وهاتك ياتعليقات من ملاك ورازان عليها

جلسو شويه كالعاده راحو بدري وقامو البنات يلفو في السوق الحره حقت المطار طبعا لازم ياخذولهم شوية شوكلاتات ولبان لزوم الرحله وبعدها رجعو أماكنهم جات ملاك تبغى تفتح اللابتوب والا شويه نادو ع الرحله وقامو كلهم

دخلو الباص وبعد كذا أتوجهو على الطياره جلسو أم مازن وأم رامي وأزواجهم مع بعض ورامي ورازان وملاك ومرام مع بعض ورائد ورامز جالسين في الجهة الي عند الشباك

طبعا لازم صراع بين مرام وملاك ستحيل مرام تخلي ملاك تجلس ع الطرف لازم هي الي تجلس وجلسو وضبطو وضعهم وكل شي ورامي مبسوط الشاشه حقته مبينه وجه ملاك ونفس الشي عند ملاك وهو يطالع فيها من تحت لتحت وهي مطنشته ولا كأنه في أحد ورازان فتحت المجلة حقت قواعد السلامه والتفت على ملاك

رازان : ميمي يختي ايش هادي صور التعليمات من سنة جدتي مايغيروها
ملاك : هههههه على قولك والله حفظت أشكال الي فيها
التفت ملاك على مرام وقالت لها

ملاك وهي معصبه شويه : رووووومه بس إنتي هرج بالجوال فاكره مازن ايش قلنا اول عن اضرار الي يتكلمو بالطياره

مرام : ايوة ادري بس جيت اقفل الا دق خلاص دحين بقفله يوه ..

وبس بعدها أعلنوا عن الإقلاع وأتأكدت المضيفة انه الكل رابط الأحزمه وقروا دعاء السفر وأقلعت الرحلة على بركة الله متجهه الى ماليزيا ومعلنه عن أحداث مشوقه ورائعه تتنتظرهم هناك

ياترى إيش حيصير معاهم من أحداث في الطياره ؟؟ والبنات ايش حيكون دورهم وايش حيعملو ؟؟ ورامي الي لسه مابان دوره ايش حيسوي ؟؟ إنتظرونا في الجزء الجاي

*لولي*[/align]

**حنووونة** · 29-06-2007, 04:18 AM

لوولي

يعطيك العافية خيتو عالقصة الرائعة

والله ابداع في التفكير الله يديمه وتجيبي لنا المزيد من القصص المشوقة

فعلا قصة راائعة ومشوقة يا ترى ماذا سيحصل في الطيارة ... وماذا سيجري عندما يصلوون مطار ماليزيا وماذا سيمر عليهم من التشويق في هذه الرحلة الرائعة ..?????

ننتظر الجزء الثاني بفارغ الصبر...

دمتي بود

حنووونة

**بيشو 2007** · 29-06-2007, 04:57 PM

حلوووووووووووووووووووة مووووووووووووووووووووووت

تسلمين لووووووووووووولي

تنفعين وبكل صراحة

كاتبة

دمت لنا ياالغالية

***لولي*** · 29-06-2007, 05:03 PM

حنووونه ..

الله يعافيكي ..

يسلمووو على مروركـ ..

بيشو 2007 ..

تسلم على مروركـ الرائع ..

دحين راح أحطلكم الجزء الثاني ..

*لولي*

***لولي*** · 29-06-2007, 05:06 PM

الجــــــــزء الثـــــــــاني

في الطياره

من عوايد ملاك ومرام انهم يشوفو اسامي المضيفين عشان يقولو لـ مازن ويشوفو لو كان يعرفهم ولا لا

بعد ما قدموا الوجبة وأكلو وكل شي وخلصت السوالف الي بين البنات صارو كل واحد يدورله على الشي الي يسليه

مرام قلبت في الشاشه ولقت فيلم أجنبي قالت خليني أشوفه ورازان معاها اوراق من كثرها صارت مجلد طبعا هادي ايش فيها فيها القصص الي عندها الكمبيوتر طبعتها كلها وخلتها معاها بالطياره عشان تتسلى فيها وصارت ملاك مهي عارفه ايش تعمل طالعت في رامي لقته فاتح اللابتوب
قالت في نفسها : ياسلام حتى انا خليني أفتحه ايشمعنى هو

وطبعا فتحت اللابتوب واتوجهت ع القصص على طول وكملت القصه الي كانت بتقراها في البيت

طبعا اشتغل العناد بين البنات رازان دارت على ملاك وقالتلها بنظرات خبث : لا تفرحي يختي كلها ساعتين بالكثير ويقفل اللابتوب وتنقهري

ملاك طالعت فيها وهي تضحك بخبث : هاهاهاها لا ياحبيبتي ماتفووووتشي على ميمي انا معايا بطارية إضافيه ومشحونه فل يعني لما تخلص هادي احط التانيه وبكذا صارت عندي ساعتين اضافيه

رازان وهي مفجووعه : ماشااااااءالله عليكي لا والله عبقرينو الأخت من جد مايفوووتك شي , أقوول بس اسكتي خليني أكمل القصه

وسكتو البنات وطالعت ملاك على رامي لقته جالس بيضحك عليهم وعلى كلامهم عملت نفسها مهي شايفة وكملت قرايه

&&&&&&&&&&&&&&&&&&&&&&&&&&&&&

وعدى الوقت ووصلت الطياره والي كان نايم صحي والي جلس يلم اغراضه ونزلو من الطياره واتوجهو البنات على طول على الحمامات عشان يضبطو أشكالهم وفصخو عبيهم بس فضلو متحجبين بالطرح ملاك ورازان كانوا لابسين زي بعض بنطلون جينز وبلايز سوداء طويلة شويه ومرام برضو لابسه بنطلون جينز وبلوزه بينك برضو طويلة شويه

رامي اول ماشافهم عقد حواجبه وبعدين قال وهو يطالع في ملاك : ول ماصدقو على طول وصلو وشالو عبيهم
ملاك ردت عليه بنظره معناها خييير وقالت : نعم نعم مالك دخل فيا إنت فاهم عندك شي روح قوله لأختك
رامي وهو منحرج شويه من ردها : دحين إنتي أحد جاب سيرتك انا كنت بكلم رازان يالطييف على طول نطت
ملاك وهي رافعه حاجب : لا والله تكلم رازان هاا اجل شكله جا حول في عيونك اذا بتكلمها ليش جالس تطالع فيا
رامي انقهر منها وجا يرد عليها : أصـــ .....
وقطع كلامه صوت أم مازن تنادي على ملاك وتقولها تسكت خلاص زودتها
ملاك صح أنحرجت من

منتديات ادما - العاب ادما - يوتيوب ادما

عزيزي زائر شبكة ادما وعضونا الكريم يجب عليك كتابة بريدك الإلكتروني بالأسفل ثم اضغط زر اشتراك ليصلك جديد