النهاية

تعب عصام من التفكير .. وعاد الى ابويه ..
الوالد : من اللي يكلمك يا عصام ؟؟
عصام : لا هذا واحد من الشباب يبي يعرف متى الاختبار ..
الوالد: طيب وشو له تقوم من عندنا ورا ما كلمته وانت جالسن فيذا؟؟؟
عصام وهو مرتبك : لا ولا شاي عادي ..
الوالد : عصام انا حاس ان فيه شي ولا تبي تقوله .. قول يا ولدي لا تخبي علينا ..
عصام : لا يا يبه ما فيه شي الله يعطيك العافية ما فيه شي ..
الوالدة : عصام انا متأكدة انك مخبي عنا شي خاصة لما كلمتك في موضوع البنت ... انت ما تبيها ؟؟ في بالك وحدة ثانية ؟؟ قول لا تستحي ..

عصام وهو يفكر ماذا يقول : بقولكم بعدين .. خلوني اشوف دروسي عندي اختبارات ..
الوالد : بكيفك يا ولدي ..

دخل عصام غرفته وهو في حالة يرثى لها .. وفكر قليلا ثم قال لنفسه : لو قلت لهم الحقيقة هل بيتقبلونها ولا لا ؟؟
يعني أقول لهم ان أهلها تاركينها طول هالسنوات وعايشة لوحدها ؟ ما فيه الا كذا خلني أقولهم ويصير خير ..


وفي المساء ..
هاتف عصام الخليوي يرن ..
عصام : اهاه هذي سحر خلني اشوف وش عندها..الو
سحر: هلا عصام كيفك ؟
عصام : تمام ..
سحر : وش فيك وش هالرد البارد ..
عصام : مافيه شي بس متعبني موضوعك .. وما لقيت حل وما فيه حل الا أقول لأهلي عن موضوعك كله وان شا الله خير
سحر : والله اني خايفة يا عصام شكل الدعوى بتخرب ...
عصام: لا .. ان شا الله ربك كريم خلني اروح لهم واشوف وبعدين أكلمك ..طيب؟
سحر : طيب حبيبي ..

ذهب عصام ووجد والديه جالسان يتناقشان ..
عصام : مسا الخير ..
والد عصام : هلا بولدي تعال اقعد ابيك ..
عصام وقد بدأ قلبه يدق : ايه يبه وش فيك ؟؟
والد عصام : يا ولدي حنا عطيناك فرصة من الصبح الين الحين ما حبينا نضغط عليك علشان تقولنا وش صاير وشفيك يا ولدي افتح لنا قلبك ..

عصام : طيب يبه انا بقولك كل شي بس اوعدوني ما تزعلون مني ؟؟
أم عصام : ان شا الله يا ولدي بس انت تكلم ..

بدأ عصام يسرد قصة سحر على ابويه من البداية الى النهاية .. ثم قال :
وأنا بصراحة الحين ودي اتزوجها .. وهذي هي السالفة كلها ..

نظر والد عصام الى والدة عصام وقال لها : وش رايك ياأم عصام في اللي قاله ولدك
أم عصام : والله ما ادري يا بو عصام ؟؟؟
ابو عصام : وانت يا عصام مصدقها الحين .. وش عرفك ان كلامها صح .. يمكن مسويه مصيبة في السعودية وهاربة .. بنات هالايام الله يكفي شرهم ..

عصام : انا واثق فيها ومتأكد من كلامها ..
ابو عصام : وش اللي يخليك متأكد انت تعرف اهلها ؟؟ ولا تعرف أي شي عنهم .. يا عصام يا ولدي حنا نبي نزوجك بنت تعرف لها أهل لها أقارب مو وحدة مقطوعة من شجرة ..

تألم عصام من كلام والده وقال : لا يبه هذي بنت ضعيفة وتستاهل كل خير وبصراحة انا ما ابي الا هي ..
ابو عصام : يا ولدي الله يهديك تبي تتزوجها وترجع السعودية يقعدون الناس يتكلمون فيك ويقولون جايب وحدة من بنات الشوارع لا أصل ولا فصل ..
عصام : لا يا بوي هذي مو بنت شوارع .. هذي وحدة قدر الله عليها انها تعيش هالحياة المتعبة وأنا كنت اكثر من أخ لها وساعدتها بكل طريقة ممكنة لأني حسيت انها انسانة محترمة وعاقلة وأنا بصراحة أفضلها على بنات الاصل والفصل اللي انت تقول عنهم ..

ابو عصام : لا يا ولدي لا تتبع قلبك بكرة تندم .. لا يغرك جمالها .. الجمال مو كل شي ..
عصام : مو بس حلوة يبه وعاقلة بعد وتسوى عشرين من البنات اللي انت تقول عنهم ....
ابو عصام وقد ازداد غضبه : انت تبي تفضحنا بين الناس .. انا مو موافق هذا كلام نهائي واذا تبي تعصيني تزوجها ..
عصام وقد أوشك على البكاء : لا يبه تكفى أحبها ..